Гродна рыхтуецца стаць цэнтрам міжкультурнага дыялогу. 5–6 чэрвеня 2026 года горад прыме XV Рэспубліканскі фестываль нацыянальных культур.

 

Юбілейнае мерапрыемства пройдзе пад дэвізам «Свята, якое 30 гадоў аб’ядноўвае нацыянальнасці», а асаблівай тэмай стане Год беларускай жанчыны.

 

Традыцыйнае шэсце прадстаўнікоў нацыянальных культур пачнецца на плошчы Савецкай і завершыцца на плошчы Леніна. Сцяг фестывалю панясуць жанчыны розных нацыянальнасцей, а Дзяржаўны сцяг Рэспублікі Беларусь – мужчыны.

Калону ўзначаляць Гаспадыня і Гаспадар свята ў беларускіх нацыянальных касцюмах. Прадстаўнікі іншых нацыянальнасцей павяжуць на сукенку Гаспадыні свае арнаментальныя стужкі. У выніку створаць унікальны касцюм, які спалучае ў сабе ўзоры ўсіх нацыянальных культур.

 

Колькасць нацыянальных падвор’яў павялічыцца да 19, а нацыянальнасцей – да 42. Гасцей падвор’і будуць прымаць з 12 да 18 гадзін.

 

Яркімі падзеямі стануць урачыстая цырымонія адкрыцця і гала-канцэрт з прызнаннем любові да Беларусі, якая стала другім домам.