Міністэрства культуры Рэспублікі Беларусь, Рэспубліканскі цэнтр нацыянальных культур, Акцябрскі райвыканкам Гомельскай вобласці і грамадскае аб’яднанне “Беларускі фонд культуры” рэалізуюць творчы праект “Берагіня” ў Мінску.

 

У яго аснове — вынікі 20-гадовай гісторыі Рэспубліканскага фестывалю фальклорнага мастацтва “Берагіня”. Фальклорны праект, распачаты напрыканцы 1990-х гг. на Рудабельшчыне, у невялічкім палескім краі Гомельскай вобласці, за гады свайго існавання ўпэўнена набыў рысы нацыянальнага фестывалю традыцыйнай культуры і перарос у фестывальны фальклорны рух.

 

Канцэрт-прэзентацыя “Берагіня” ў Мінску” адбудзецца 10 лістапада 2018 г. у Палацы культуры Мінскага трактарнага завода.

 

З 15.00 у фае Палаца можна наведаць тэматычныя выстаўкі:

 

– “Берагіня” ў 20-гадовай прасторы”;

– “Берагіня”  ў рэгіянальных праектах”;

– фоталетапіс “Берагіні” ў калекцыях фотакарэспандэнтаў рэспубліканскіх і рэгіянальных СМІ;

– Выцінанка: Беларускі народны танец.

 

Да развучвання беларускіх танцаў “Полька”, Матлёт”, “Птушачкі”, “Шамель”, “Двойка”, “Матылёк”, “Залатыя горы”, “Лысы” і інш. можна далучыцца падчас майстар-класа па народных побытавых танцах. Каардынатар-танцмайстар – Алена Каліноўская.

 

У 16 гадзін на сцэне Палаца культуры пачнецца канцэрт-прэзентацыя з удзелам аўтэнтычных гуртоў, дзіцяча-моладзевых танцавальных і спеўных ансамбляў, інструментальных капэл Віцебскай, Гомельскай, Гродзенскай і Мінскай абласцей.

 

Канцэрт-прэзентацыя прадугледжвае конкурс танцавальных пар і сольныя харэаграфічныя імправізацыі з удзелам лаўрэатаў і дыпламантаў рэспубліканскіх конкурсаў народнага побытавага танца.

 

У канцэртнай праграме прыме ўдзел калектыў нацыянальных супольнасцяў Рэспубліканскага цэнтра нацыянальных культур. Канцэртны нумар падрыхтаваў і ансамбль экспертаў Рэспубліканскага фестывалю фальклорнага мастацтва “Берагіня” ў складзе выкладчыкаў Беларускага дзяржаўнага ўніверсітэта культуры і мастацтваў Уладзіміра Зяневіча, Вячаслава Калацэя, Таццяны Пладуновай, Эвеліны Шчадрыной.

 

Запрашаем мінчан і гасцей сталіцы

на свята фальклорнага мастацтва!