Ансамбль “Хамар Ял”
На тэрыторыі Беларусі на шэрагу з іншымі нацыянальна-культурнымі грамадскімі аб’яднаннямі дзейнічае міжнароднае грамадскае аб’яднанне чувашоў “Атал”, пры якім сваю творчую дзейнасць вядзе ансамбль “Хамар Ял”. Ансамбль складаецца з 18 чалавек. Кіраўнік ансамбля – Луіза Аляксандрава.
У рэпертуары творчага калектыву вясёлыя нацыянальныя песні і прыпеўкі на чувашскай мове. Таксама артысты выконваюць вакальныя кампазіцыі на рускай і беларускай мовах. Адрозніваюцца сваёй дзіўнай прыгажосцю і арыгінальнасцю яркія сцэнічныя касцюмы удзельнікаў калектыву, выкананыя ў тэхніцы вышыўкі, чырвонымі ніткамі на беласнежным фоне і нацыянальныя галаўныя ўборы жанчын, зробленыя з манет, бісеру і пацерак. Ансамбль “Хамар Ял” цалкам традыцыйны калектыў, які адлюстроўвае самабытную народную культуру і звычаі чувашоў з дапамогай песень, танца і нацыянальнага касцюма. Калектыў з’яўляецца адным з самых першых, пастаянных і актыўных удзельнікаў Рэспубліканскага фестывалю нацыянальных культур у г. Гродна, упрыгожвае сваім удзелам Свята рускай культуры ў Верхнім горадзе Мінска, а таксама з’яўляецца частым госцем дзяржаўных святаў у г. Чэбаксары (Чувашская Рэспубліка РФ).
