17 красавіка ў Музеі Янкі Купалы адбылося яркае і пазнавальнае мерапрыемства «Чысты чацвер», арганізаванае Рэспубліканскім цэнтрам нацыянальных культур разам з Дзяржаўным літаратурным музеем Янкі Купалы. Удзельнікі акунуліся ў свет велікодных традыцый, даведаліся пра іх гістарычна-культурную каштоўнасць, а таксама прынялі ўдзел у майстар-класе па роспісе велікодных яек.

 

Хэдлайнерам вечара стала Вольга Хачкова, народны майстар Беларусі і начальнік аддзела народнай творчасці Рэспубліканскага цэнтра нацыянальных культур. Яна правяла захапляльную лекцыю, дзе падзялілася гісторыяй роспісу пісанак у Беларусі, а таксама сакрэтамі майстэрства.

 

Галоўнай часткай праграмы стаў майстар-клас, падчас якога ўдзельнікі маглі выявіць свае творчыя здольнасці, ствараючы ўнікальныя арнаменты на велікодных яйках. Абавязковай умовай для ўдзелу было прынесці з сабой два зварыных белых яйкі, якія пасля станавіліся часткай дэкаратыўнага мастацтва.

 

«Чысты чацвер» стаў не толькі адукацыйнай, але і натхняльнай падзеяй для ўсіх удзельнікаў, падкрэсліўшы багацце беларускай культуры і важнасць захавання яе традыцый.